Møtet vart gjennomført på Sande rådhus og kommunestyret gjorde følgjande vedtak : 

Sak 88/22: Tilsetting av kommunedirektør og konstituering av fungerande kommunedirektør

Vedtak :

I. a. Sande kommunestyre tilset som kommunedirektør i Sande:

1. Renathe Rossi, f. 1977
2. Trond Berg, f. 1968

Renathe Rossi vert slik tilbydd stillinga som kommunedirektør i Sande. Dersom ho skulle takke nei, vil tilbodet gå vidare til Trond Berg.

     b. Forhandlingsutvalet forhandlar startløn for den nye kommunedirektøren.

     c. Ordføraren får fullmakt til å underteikne kontrakt og inngå arbeidsavtale med ny kommunedirektør.

 II. Oddbjørn Indregård, f. 1969, vert konstituert som kommunedirektør i Sande frå 1. januar 2023 og fram til ny kommunedirektør er på plass.

Sak 77/22: Larsnes IL - Søknad om spelemidlar til Halleosen Fritidspark

Vedtak :

Sande kommunestyre vedtek å søke spelemidlar i hht søknad for å realisere tiltaket.

Sande kommunestyre prioriterer dette nærmiljøanlegget som nr 2, jf delplan for idrett og fysisk aktivitet.

Sak 78/22: Sande kommune - Søknad om spelemidlar til Kvamsøy Aktivitetspark

Vedtak: 

Sande kommunestyre vedtek å søke spelemidlar i hht søknad for å realisere tiltaket.

Sande kommunestyre prioriterer dette nærmiljøanlegget som nr 1, jf delplan for idrett og fysisk aktivitet.

Sak 83/22: Larsnes IL - Søknad om spelemidlar til Fotballhall

Vedtak :

Sande kommunestyre er positive til initiativet frå Larsnes IL om å realisere ein fotballhall.

Sande kommunestyre er positive til plasseringa i Vardane - og i den grad dagens rettigheiter til arealbruk må utvidast til også å omfatte fotballhall, får ordførar fullmakt til å etablere slike rettigheiter for Larsnes IL.

Sande kommunestyre vedtek å prioriterer fotballhallen som nr 1, ordinære anlegg, i gjeldande kommunedelplan for idrett og fysisk aktivitet.

Sande kommunestyre vedtek å sende fornye søknaden frå Larsnes IL om spelemidlar for å realisere tiltaket

Sak 84/22: Gursken IL - Søknad om spelemidlar til Turveg Skogevatnet

Vedtak :

Sande kommunestyre vedtek å søke spelemidlar i hht søknad for å realisere tiltaket. 

Sande kommunestyre prioriterer dette nærmiljøanlegget som nr 3, jf delplan for idrett og fysisk aktivitet

Sak 82/22: Invitasjon til å delta i emisjon i Voldsfjordkryssinga AS

Vedtak :

Sande kommunestyre vedtek å ikkje vere med på emisjonen til Voldsfjordkryssinga AS

Sak 85/22: Administrativt vertskommunesamarbeid på økonomiområdet

Vedtak :

1. Sande (vertskommune) og Vanylven (samarbeidskommune) inngår administrativt vertskommunesamarbeid på økonomiområdet frå 2024, med heimel i kommuneloven §20-2.
2. Kommunestyret legg til grunn at det nye samarbeidet skal redusere driftskostnadene innanfor ansvarsområdet.
3. Administrasjonen legg fram forslag til samarbeidsavtale for politisk godkjenning innan 30.06.2023.

Sak 86/22: Avtale om fordeling av kostnader for ny ambulanse/samfunnsbåt

Vedtak :

Sande kommunestyre godkjenner avtalen mellom Helse Møre og Romsdal HF og Sande kommune ang kostnadsfordeling ved bruk at ambulanse-/legeskyss og samfunnsbåt slik den ligg føre i vedlegg. 

Sande kommunestyre gir fullmakt til ordførar å signere avtalen

Sak 87/22: Framlegg til endra inntektssystem for kommunane - høyringssvar frå Sande kommune

Vedtak :

1. Sande kommune kommune rår til at det framleis skal vere mogleg å redusere den kommunale formuesskatten. Redusert formuesskatt er eit godt distriktspolitisk tiltak som bidreg til verdiskaping. Privat kapital er avgjerande for å skape gode lokalsamfunn, og redusert formuesskatt er eit godt verkemiddel for å oppnå det. Ein større del av overskotet frå slik verdiskaping bør ligge igjen lokalt for å vidareutvikle aktivitet og bulyst også i distrikta.
2. Sande kommune er positiv til endringar i inntekts- og utgiftsutjamninga som legg til rette for auka aktivitet og bulyst i distrikta.

Sak 80/22: Sande kommune - Høyringsinnspel i samband med framlegg til nytt rutekonsept for rute 01.

Vedtak :

1. Sande kommunestyre vurderer ikkje eit nytt rutekonseptet - der ein går frå «pendelrute» til «rundrute» - som eit relevant transporttilbod for våre bygdelag i Sande.
2. Sande kommunestyre kan ikkje sjå at avbøtande tiltak er vurdert for å oppretthalde eit tenleg transporttilbod i området.
3. Sande kommunestyre viser til tidligare korrespondansar der to ferjer i heilårsdrift er vurdert som transportbehovet i rute 01.
4. Sande kommunestyre viser vidare til vedlagte innspel frå befolkninga i Sande, og bed om at fylkeskommunen tek omsyn til desse.

Sak 81/22: Sande kommune, samfunnsplan - Godkjenning av Samfunnsplan 2022 - 2034

Vedtak :

I hht §11-15 i plan- og bygningsloven vedtek Sande kommunestyre ny samfunnsplan slik den går fram av vedlegg
nr 1

Sak 79/22: Budsjett 2023, økonomiplan 2023 - 2026

Vedtak :

1. Kommunedirektøren sitt framlegg til økonomiplan 2023 - 2026 og årsbudsjett 2023 vert vedteke slik det går fram av framlegget og med dei rammene som det går fram av tabellar og oppstillingar under menypunkt “Budsjettvedtak”.

2. Kommunedirektøren sitt framlegg til «Investeringsbudsjett 2023-2026» vert vedteke slik det går fram av “Investeringar i økonomiplanen”. Sande kommunestyre godkjenner eit samla låneopptak på inntil kr 20 400 000.
 

3. Framlegg til gebyr- og betalingsregulativ for 2023 vert vedteke slik det går fram av “Gebyrliste”, med dei endringane som vart vedteke under behandlinga.

4. Sande kommunestyre vedtek følgjande forslag til finansielle måltall for økonomiplanperioden 2023-2026:

 - Netto driftsresultat i % av brutto driftsinntekter bør vere minimum 1,75% - Disposisjonsfondet skal i løpet av planperioda ligge på 4 % av brutto driftsinntekt.

 På Innsyn finn du protokollen frå møtet.